dharma wecana

Inggih matur suksma majeng ring pengenter acara antuk galah sane ketiba ring sikian titiang, sadurung titiang ngelanturang atur ngiring sareng-sareng nunas wara nugraha majeng ring Ida Sang Hyang Parama Kawi, pamekas  majeng ring Ida Betara ratu gede begawan penyarikan  dumadak napi sane katur malih bosbos puniki sida nemu rahayu  mapala sidaning don antuk ngaturang pengastungkara Panganjali :

                                                  "Om Swastyastu"

Majeng ring  para  pinandita jro mangku kalih jro dangka sami sane gumanti dahat  suciang titiang,

Majeng ring linggih dane Jro Bendesa maka miwah Prajuru Adat  lan Dinas sami sane Bhaktinin titiang

Majeng ring para angga panitia pekan seni lan budaya desa pekraman kubu sane wangiang titiang

Iratu Ida dane sareng sami sane tan prasida antuk titiang nyarca siki kalih sane banget tresna sihin titiang

           Rasa angayu bagia, luir kadi angganing puspa sumekar  wiakti manah titiang kadi mangkin,riantukan prasida matemu  mesadu rasa majeng ring I ratu Ida Dane sareng sami ri tepengan galah sane kalintang becik puniki. Titiang Ni Putu Dian Dhitayani silih sinunggil pamilet  dharma wecana sakeng krama dadia Pasek Gelgel Bendesa Manik Mas pacang ngaturang atur sematra nganinin indik pemargin silih sinunggil yadnya sesa druwene sane ketah iriki kebaos  banten ngejot.

Sakemawon sadurung titiang ngelanturang indike punika, lugrayang dumun titiang ngaturang daging semertin banten, banten silih tunggil srana upacara yadnya manut Agama Hindu ring Bali. Banten punika waluya basa mona. Basa mona tegesnyané basa sané siep tan pesu raos. Nanging ring sajeroning Banten punika akéh pesan mrasidayang mesuang raos sané madaging tutur utama. Unteng tatwa Agama Hinduné kasinahang ring Banten. Banten punika basa Niyasa sané suci mangdané suksman tatwa Agama Hinduné punika prasida neked tekén krama Hinduné makasami. Lengkara upacara mawit saking basa Sansekerta sané maartos sayan paek. Yan ring basa Indonésia mendekat. Malarapan upacara yadnya punika umat Hinduné sayan marasa nampek kayune ring Ida Sanghyang Widhi, ring sajatma sami miwah ring sarwa prani minakadi ring Stawira muang Janggama. Stawira punika sarwa tumuwuh, Janggama punika sarwa buronné sami. Nampekang raga ring Sarwaprani madasar antuk asih. Nampekang raga ring Sajatma sami madasar antuk Punia. Nampekan raga ring Ida Sanghyang Widhi Wasa madasar antuk bakti. Asih, Punia, muang Bakti kawastaning Tri Para Artha. Suksmannyané tetelu tetujon ngamargiang agama. Punika mawinan suksman banten punika manut Lontar Yadnya Prakerti wénten tetiga. Tetiga suksman banten manut Lontar Yadnya Prakerti inggih punika. Sahananing Bebanten pinaka raganta tuwi,pinaka warna rupaning Ida Bhatara, pinaka Anda Bhuwana. Artin nyané sami bantené punika waluya anggan i manusa, pinaka kawisésan Ida Sanghyang Widhi Wasa, pinaka Bhuwana Agung. Dadosnyané malarapan antuk  banten punika i raga manusa nampekang déwék ring Ida Sanghyang Widhi malarapan antuk bakti, nampekang raga ring sajatma sami malarapan antuk punia. Taler nampekan raga ring sarwa praniné sami malarapan antuk asih. Banten punika taler kawastanin upakara. Lengkara upakara mawit saking basa Sansekerta mateges melayani manut ring basa Indonesia. Yan ring basa Bali mateges ngayah.Wénten Subhasita Wéda utawi sané kasurat asapuniki "Para upakara punyaya, papaya para pidana". Tegesnyané sapa sira sané setata ring uripnyané ngayahin parajanané jaga polih punia, sapa sira sané setata nyakitin parajanané (anaké siosan) jaga keni papa neraka ring uripnyané. Ri tatkala ngayah punika tatwa sané kasuksmaang inggih punika na asmita. Asmita tegesnyané negehang déwék yan turah mangkin kawastanin égois. Yan sampun ngayah sakadi mekarya banten sareng-sareng sikap égoismé punika kaandapang. Yan sampun asmita utawi sikap égois punika mrasidayang ngandap kasor mejanten sampun sida ngawetuang upakara banten sane becik. Anaké sané asapunika kocap jaga mrasidayang molihing paica wara nugraha saking Sanghyang Widhi Wasa. Mungguing suksman banten sané tetiga punika yan sampun mrasidayang nelebang ring sajroning kayun, selanturnyané jaga kapanggih ring laksana, wacana miwah kayun sane becik. Tri Kaya Parishudane, Manacika,Wacika, muang Kayikané jaga setata madasar antuk asih, punia, muang bakti. Tatwa Tri Para Arthané punika yan ngresepang nénten ja kéweh pesan. Nanging yan sampun ngamargiang ring kauripan sadina-dina dahat sengka. Tatwa Tri Parartha punika mangda dados kabiasaan silih tunggil nyuksmayang ngayah makarya banten. Banten punika malakar antuk sarwa tumuwuh miwah sara tumitah inggih punika entik-entikan miwah sakancan buron. Manut Manawa Dharmasastra V.40 kasurat sakancan sarwa entik-entikan miwah sarwa buronné sané kaanggén srana upakara, ring tumitisan nyané malih pidan jaga nincap kawéntenan nyané. Dasar kayunné ri tatkala nganggén srana upakara sahananing sarwa praniné punika tresnasih utawai asih. Dadosnyané banten punika dahat teleb pesan suksmannyané

           Ida dane para darsika sinareng sami, mawosang indik yadnya sesa utawi sane ketah deriki kebaos banten jotan punika wantah pidabdab sane dangan pisan, napi mawinan asapunika?, duaning pemargi puniki mejanten sampun nyabran rahina iratu ida danen titiang ngemargiang tur ngelaksanayang ngejot, sakemawon abot nyane aturang titiang ring para atiti sareng sami, menawita kantun akeh semeton kalih pengelingsir titiang sane durung tatas ring tatuwek utawi tatujon ngelaksanayang yadnya sesa punika.

 Manut daging lontar Siwa Gama sane panggihin titiang irika wenten kebaos sakeng Sri Maharaja Gondarapati inggian punika :

'"Lah ya kamung tanda mantri sedaya, rengewaken wecanan mami,

yeki pranidanangku, kateka-tekeng prati sentanan ta hlom, hwya wismrti, hwya kita tan stiti bhakti ring dewa, mwah ri sang mahabrahmana,

ikang sinanggeh pangupadyayan, hisnira sang rsi sidhayoga, sahitya ri sang prabhu, maka wungkalang dharma satya, mwah ri sedengta amangan awya tan pebanten, yadnya sesa ngaraniya, ikang sega pinanganta lana"'.

Yening ojar titiang daging lontar Siwa  Gama punika menawi asapuniki daging nyane :

"Uduh dewa para bahu danda danda mantri makejang, pirengang pawarah manirane, ne makejang sangkaning kayun manira, keto masi katekeng pratisentanan dewane kawekas, de pesan i dewa engsap, de i dewa tuna pangubhakti ring para dewata, muwah ring para brahmana pandita, sane kasinangguh pageguruan, ento katurunan beghawan Sidhayoga, tur setata bhakti teken para ratu, ento pinaka dasar i dewa ngelaksanayang ajaran agama, tur risedek i dewa pacang ngajeng de pesan engsap ngae bebantenan, yadnya sesa adannyane, gae aji nasi ane ajeng i dewa nyabran dina".

            Manut kadi daging lontar Siwa Gama punika mejanten sampun pastika pisan iraga sareng sami kepatutang ngelaksanayang sane mewasta yadnya sesa utawi ngejot. Sane medasar antuk nasi utawi sega, tur ketah kadi mangkin kabaos segehan saiban.Segehan saiban utawi jotan, puniki kakaryaning antuk dasar nyane daun pisang sane katuwes sawatara duang nyari lawan aguli. duur nyane dagingin nasi sane maulam jukut/jangan lan ulam/be, taler kejangkepin antuk uyah utawi tasik. ringkes nyane aturang tityang yadnya sesa punika kakaryanin antuk napi-napi sane keratengan ritatkala iraga meratengan nyabran rahina, duaning manut daging lontar dharma sastra ring sakuwub pakeluargan mejaten sampun nyabran rahina ngawentenang ambek himsa karma, pinaka wimba aturang tityang, iraga ngepik bayem, ngabut jempem nuwas bawang,ngoreng pindang, bilih bilih pacang manggang ayam punika sami ambek himsa karma, dados anggen nyupat dosa papa,mala ring sarwa prani punika, patut sarwa prani punika aturang dumun ring ida sang hyang widhi sane meprawaba sang hyang panca maha butha, sumangdane kapungkur wekas sarwa prani punika dados embas maguna pinaka mahkluk utama. banten jotan utawi  segehan saiban punika sane kekaryanin pinih unteng nyane ring lelima genah panyupatan, minekadi ring pewaregan/paon, akeh sarwa prani sane katunu, sane brasta ring api, raris ring talenan irika akeh taler sarwa maletike minekadi i bawang, jahe lan sane tiosan kerecah, ring lesung utawi cobek punika genah ngincuk lan ngulig sarwa maletike, ring tiuk,blakas lan sangihan punika serana anggen nektek sarwa pranine, tur ring sampat mejanten sampun akeh sarwa kumeratap-kumeritip sane padem rikanjekan nyampat. maka lelima genah lan alat punika majanten sampun akeh pisan pangorombo nyane ritatkala iraga sareng sami ngemargiang kehuripan, punika mawinan sandang pisan iraga sareng sami nyuksmayang wantuan sakeng alat-alat punika  sane masedana antuk ngaturang segehan saiban utawi jotan. semaliha tan lali taler menawi wenten malih genah-genah sane lianan manut kadi keyakinan lan kepercayaan suwang-suwang sane kaaturin segehan saiban utawi jotan. nangin unteng nyane pisan ring lelima genah sane aturang titiang i wawu punika patut pisan kelaksanayang yadnya sesane.

         Ida dane para atiti sinareng sami, satios ring lontar siwa gama kalih dharma sastra sane nyantenan pemargi yadnya sesane, wenten malih sane make dasar pisan sane magenah ring kitab suci druwene inggih punika Pustaka bhagawad gita. bab III sloka 13,

"yajna sista sinah santo,

mucyante sarva kilbisaih,

bhunjate te tyagham papa,

ye pacanty atma karanat",

yening baliang titiang manawi asapuniki  daging nyane :

"Sang sapa sira ugi sane ngajeng sisan yadnya

punika pacang bebas saking dosan nyane

nanging sapa sira ugi sane ngratengan tur ngajengan pedidi

punika sayuwaktian nyane ngajeng dosan nyane".

          Saking wedaran kitab bhagawad gita puniki taler irage sareng sami kapasti kayang mangda nglaksanayang upacara yadnya sesa sadurung meajengan, mangda nentan kabaos ngajengan dosa, yening tatuekan titiang daging sloka punika sane kabaos sisan yadnya nenten je wenten tios sami ajengan sane kapangguh risampune keaturan sematra mantuk ring ida sang hyang widhi wasa. ri sampune nglaksayang yadnya sesa punika wawu raris ngajeng nunas amerta pinake pangeleburaning dosa, papa neraka, mewali malih aturan titiang pemargi punika wantah nyupat sakancan sarwa prani sane sampun irage sareng sami polih kahimsa karma, duaning ring jagate puniki memargi hukum supat kasupat, irage dados jadma wantah pinih utama sane prasida nyupat sarwa pranine tiosan medasar antuk manah satwika, punika mawinan sarwa pranine sami patut nunas panyupatan ring i manusa mangdane kaungkur wekas prasida dados embas makluk sane utama.

           Inggih ida dane sareng sami sane wangiang titiang, wantah kadi asapunika presida antuk titiang ngaturang daging Dharma wacana puniki, yening prade wenten kirang langkung atur basa basitan titiang ping kalih pari laksanan titiang  sane nenten mungguh ring sajeroning pekahyunan gumanti titiang banget nunas geng rna pengampura. Pinaka wesananing atur, titiang ngaturang prama santih

Om Santih Santih Santih Om