TATTWA BANG WAYABIYA

TATTWA WANG BANG WAYABIYA

Kacarita ne mangkin Ida Wang Bang Wayabiya madruwe putra lanang asiki maparab pateh kadi Ida I Aji  inggih punika Ida Wang Bang Wayabiya utawi Ida Bang Kaja Kauh jumenek ring Besakih, Ajine Ida Wang Bang Wayabiya sampun werdha tur lebar moksah ke swahloka.

Carityayang mangkin ritatkala Ida Bang Penataran, okan Ida Wang Bang Tulus Dewa mebawosan sareng arine ming sikin Ida Bang Wayabiya. Ida Bang Wayabiya mapikayun jagi ngelamar putrine Ida Penataran sane meparab Ida Ayu Puniyawati, nangin sampun kariinin olih I Gusti Pinatih Rsi, sakeng Kertha langu Badung, pretisentana Ida Bang Banyak Wide. Seantukan nenten prasida tumuli raris Ida Bang Wayabiya memargi tanpa pamit ring rakane, mangutang-ngutang raga pemargin Idane tan keni antuk ring dija-dija Ida rauh. Suwe kasuwen Ida Bang Wayabiya ngungsi ke Jagat Balingkang, tan asuwe Ida irika raris jenek Ida ring  Pura Panerajon Panulisan Tegeh Kahuripan. Ring Pucak Panulisan punika Ida polih waranugraha, raris dados pandita utama tur Ida mabiseka Ida Sang Bang Bhujangga Panulisan. wekasan wenten grubug jagat Bangli, meweh wong Bangline sawireh tan prasida munahang gring ring kramaning Bangli, punika raris wenten sabda mangda Ida Sang Bang Bhujangga Panulisan nedunin munahang gring grubug ring Bangli. Sayewakti akeh duk punika kramaning Bangli sane padem tur sampun akeh sane rarud ke dura negara ninggal jagat Bangli. Agelis Ida Bang Bhujangga tedun ke Bangli tur ngungsi Alas Jarak Bang raris ke Prahyangan Hyang Ukir sane taler kebawos Prahyangan Ida Hyang Api, ngelantur Ida memargi ke Prahyangan Ida Hyang Kalimama ring Simpat Bunut raris ke Prahyangan Ida Hyang Tanda ring Pucak Bukit Tengah Bangli. Irika raris Ida ngelarang yoga semadi, raris magingsir ring Bukit cemeng tur ngewangun linggih Pesraman. Wekasan Ida ngewangun Grya sane meparab Grya Lebur Gangsa ring Simpat Bunut, ring luhuring griya Ida ngewangun prahyangan genah pengayatan Ida Bhatara ring Panerajon Panulisan Tegeh Kahuripan, sane kawekas meparab Pura Tegaa. Ida Bang Bhujangga Panulisan kesarengin antuk pamongmong Bukit Cemeng raris Ida ngelanglang-ulangun ngadegang Prahyangan Taman Sari maka patirtan Ida Bhatara Pangupahayu jagat Ida Hyang Pemayun, muwang Tirtha Giri Kesuma sane kebawos genah tirtha Amertha pabersihan sehananing mala letuh ring jagate. sakeng irika Ida mayoga nyikiang pikayun Ida ngayat Ida Hyang Parama Kawi, raris mekanten Teja ring Pascimaning Bukit Bangli. Digelis Ida memargi ngerereh wit teja punkika, wenten raris mekanten Batu Dumilah Mecahya Gni, irika raris Ida ngewangun yoga semadi, nunas pamunah gring. Ring genah punika wekasan kewangun Pura Siwa Pati. Sakeng genahe irika Ida ngelarang Dharma Usadha anggen munahang sarwa penyakit gring ring kramaning Bangli, raris Ida ngelantur ngewangun yoga semadi maring Pura Tengahing Alas sane meparab Pura Alas Angker, kesah sakeng irika Ida ngunsi genah ke Alas Daun, seantukan akeh wong padukuhan ring genahe punika sane sakit tan prasida ketambanin. Ida raris ngelarang yoga semadi nunas kasidhian ring Ida Bhatara  Panerajon Panulisan Tegeh Kahuripan, tur ngadegang palinggih Gedong meraab antuk klangsah, wekasan Alas Dasun punika kawastanin Jagat Tambaan, seantukan sakeng irika Ida Bang Bhujangga ngelarang usadha tetambaan ring kramaning desa-desa ring jagat Bangli.

Uningang mewali ring Gumi Bale Agung, Bangli Ida Sang Pandhita Sidhi kacunduk sareng I Pasek Bukit Cemeng, wadwan Ki Pasek akeh sane padem miwah won lesu keni pinakit, ritatkala punika rumasa ring kapiwelasan Ida Sang Bang Bhujangga Panulisan ngicenin penawar ring wadwan Ki Pasek Bukit cemeng, raris tanpa jumuga mewali seger wadwan Ki Pasek Bukit Cemeng sekadi ne sampun-sampun, punika mawinan genahe punika kawastanin Pradesa Pakuwon ngantos kawekas. Ida Bang Bhujangga Panulisan raris keaturan rabi okan dane I Mangku Pasek Bukit Cemeng, raris wekas kawekas wenten embas putra tatiga, kaping luhur Ida Bang Tulia, sane kesah ke jagat Lebah Klungkung, kaping kalih Ida Bang Dauh ngewangun asrama ring Taman Sari, raris kesah tur jenek ring Pagereman, kaping tiga Ida Bang Kaja Kauh jenek ring Bangli. Putrane ring Pagereman kantun ngemanggehang ke Brahmanan ngantos kawekas.

Putrane kaping tiga duk punika mireng indike warih semetone warih Ida Bang Tulus Dewa inggih punika Ida Bang Penataran sampun ngelukar kebrahmanan Idane dados Arya Satrya Wangsa dados I Gusti, tumuli raris Ida Bang Kaja kauh mangalih kawentenan Idane sakeng brahmana wangsa dados Arya-Ksatrya seantukan eling ring bhisaman leluhur Ida, Ida Bang Manik Angkeran, "Ala Ayu Tunggal" Ida Bang Kaja Kauh raris dados I Gusti Bang Kaja Kauh. Rahajeng Ida malungguh ring Jagat Bale Agung, Bangli, kasuwen-suwen malinggih Ida mapudgala ngentosin linggih Ida I Aji dados pandita, abhiseka Ida Rsi Bang Bhujangga Panulisan.

Caritayang ne mangkin ring Panegara Bangli duk kawawa olih Ngakan Pog, wenten patungkas majeng ring linggih Ida Dalem, punika mawinan palungguh Dalem ngawentenang utusan tanda mantrin Idane maparab Ki Arya Jelantik, Ki Arya Bang Pinatih Perot, Ki Bang Sidemen miwah Ki Gusti Nyoman Rai sane kaicen nyelet kerise Ki Tan Khadang, kairing olih para bala akweh sregep makta senjata, sekadi segara kekatonang, sesampune prapta ring Bangli raris rame perange irika, Ki Gusti Ngurah Jelantik kacunduk ngelawan Ngakan Pog. Yudhane rames pisan akeh balane kelawan antuk I Gusti Nyoman Rai, raris ring tengahing yudha kasor Ngakan Pog, miwah para balan Idane sami, sawetara ring kiduling Bangli kekawonang antuk I Gusti Pinatih Perot, punika mawinan ajerih resres panjak Bangline sinamian nenten pisan purun jagi nungkasin ring linggih Ida, mawinan suniya sepi dados nyane jagat Bangli tan wenten sane ngeratonin.

Tucapa mangkin I Pasek Bendesa Gelgel, I Pasek Telagi, Ki Kayu Selem mapiguman, seantukan negareng Bangli tan maduwe Ratu, pisarat Ki Pasek sinamian jagi nunas majeng linggih Ida Dalem Ketut Smara Kepakisan  ring Gelgel sumangdane wenten Ratu sane ngemong jagat Shingarsa Bangli. asapunika pacang pinunas Ki Pasek sinamian majeng linggih Ida Dalem ring Gelgel, raris memargi Ki Pasek sedaya jaga pedek tangkil ring Ida Dalem, tan kacaritayang ring margi sampun rauh ring ajeng Ida Dalem, raris matur Ki Pasek ngaturang pinunas dane mangda Dalem mapaica Gusti sane macekin panegara Bangli.

Bawosang mangkin sapenilar Ki Pasek Bangli sakeng Gelgel, Ida Dalem mapautusan kawula kalih diri ke negara Badung, digelis memarga utusan punika, tan kacaritayang ring margi raris sampun rauh utusan ne ring negara Badung, ngojog Puri Kerthalangu, irika utusane tangkil ring okan Ida I Gusti Pinatih Perot, inggih punika I Gusti Aglurah Pinatih Rsi miwah I Gusti Anglurah Bija Pinatih. Matur raris utusane punika : "Singgih Ki Gusti Ngurah, mangda Ki Gusti digelis tangkil ka Gelgel ring bukpadan Ida Dalem, titiang wit utusan Ida Bhatara Dalem Gelgel'. Asapunika atur utusane punika raris mewali malih ka panegara Gelgel.

Uningayang mangkin ring Puri Kerthalangu ri sampune wenten pagenurasan sareng kalih raris I Gusti Anglurah pinatih Rsi ngandikain arine I Gusti Anglurah Bija Pinatih mangda pedek ring ajeng Ida Dalem, I Gusti Anglurah Bija Pinatih raris memargi melaku tangkil ring ajeng Ida Dalem Gelgel, nenten kacaritayang ring margi rauh Ida ring Puri Sweca Pura Gelgel, raris mawecana palungguh Ida Dalem  :"Ih Kyai Ngurah Bija, Ngurah titahang manira amacekin gumi Singharsa Bangli, Ngurah ane ngemong panegarane ento, sameton ngurahe depang iya ngisiang Jagat Badunge". Asapunika pawecanan Ida Dalem. Raris matur I Gusti Anglurah Bija :"Ainggih yening asapunika titah palungguh Bhatara Dalem, titiang wantah sairing, miwah titiang ngelungsur geng rena sinampura mangda ledang Cokor I Dewa ngicenin titiang pariagem kawitan titiange, sane kebakta sakeng Majepahit duke riin". "Nah kema mejalan Ngurah enggal-enggal ne ada aba piagem Ngurahe, tembaga mwang lontar lan keris sungsungane meadan I Loting miwah Pedang I Gepang, ento makejang sungsung Ngurah di gumi Bangline wekasan", ri sampune katunas kalilirane miwah kawitane punika raris mepamit I gusti Anglurah sakeng Gelgel ngunsi jagat Kerthalangu, Badung.

Kocap mangkin sapengrauh I Gusti Anglurah Bija sakeng Gelggel raris ngawentenang parareman sareng rakane I Gusti Anglurah Pinatih Rsi mwang para sanak sinamian, putusing paheman wenten putrane sane kasumbung sane jagi ngiring pikayun Dalem mapesengan I Gusti Ngurah Bija Pulaga. Sesampune puput bebaosane wenten dewasa ayu, ri kala somo wage Julungwangi sasih kalima tanggal ping 20, rah, 1, tenggek 7, saka warsa 1375, warsa masehi 1453 rikala punika ngerawos I Gusti Ngurah Bija Pulaga ring I Aji, muwah para sanak sinamian, ature :"Ne mangking titiang putran Ajine matur mepamit ring palungguh Aji miwah ring beli, adi. Pungkuran mangda tan pisan beli, adi lali ring sikian titiange, rauhing pretisenanane pungkuran, titiang katitah olih Ida bhatara Dalem macekin Jagat Singharsa Bangli". Mesawur rakane," Adi Ngurah Bija yening sampun patitah Ida Bhatara Dalem, beli sareng adi-adine iriki rumasa keweh katinggalin olih Adi pacang ninggal Panegara Badunge, nangin sami sampun praya lascarya, buina beli tusing lakar mapegatan mapasemetonan sareng adi rawuhing kapungkur wekas, semaliha ada wadwa 455 diri ento lakar ngiringang adi ke Singharsa Bangli". Asapunika pamuput bebawosane ring Badung ring Puri Kerthalangu, sesampune punika mepamit I Gusti Ngurah Bija Pulaga ring Ajine, raka miwah arine sami, memargi Ida sinambi nyunkelit keris I loting muwang Pariagem lan Pedang I Gepang. Pemargin Idane tumus kairing olih para bala kawulane sami, tan kaceritayang ring margi raris sampun rauh ring Singharsa Bangli, ngojog irika ring Kiduling Bukit Bangli, mapuri Ida ring Pradesa Bale Agung. Para bala iringane nyusup ngerereh genah ipune suwang-suwang.

Risampune I Gusti Bija Pulaga madeg nata ring Singharsa Bangli raris kacunduk ring Ida Rsi Bang Bhujangga Panulisan, raris Ida sang kalih magendurasa, atanya Ida Sang Rsi :"Aum nanak sang prabhu, bapa meled metaken ri nanak, mangda weruh Bapa ri kawentenan nanake, sapa sira ne ngawentenang nanak, warahen ri Bapa, mangda Bapa uning". Raris matur Ida I Gusti Ngurah Bija Pulaga :"Ainggih aratu peranda, ampurayang titiang purun matur ring palungguh I Ratu indik kawentenan titiange, titiang putran I Gusti Ngurah Bija Pinatih sane macekin gumi Kerthalangu, Badung, ne mangkin titiang katitah olih Ida Dalem macekin gumi Bangline iriki, leluhur titiange nenten je tios wantah Ida Bang Banyak Wide putran Ida Danghyang Bang Manik Angkeran". Dados kagiat Ida Rsi :"Uduh nanak buka katuduhang Widhi,suweca pesan Ida Hyang Parama Kawi, prasida Bapa kacunduk teken I Dewa, Bapa tusing ja lian warih Ida Bang Wayabiya, semeton leluhur nanake Ida Bang Banyak Wide, dadosne mawit tunggal nanak kelawan Bapa". ledang pisan Ida maka kalih tan prasida antuk manyeritayang, pungkuran suwe-kasuwen seantukan sampun raket pisan pasemetonane, tan dados pasahang maka kalih, raris wenten runtuh pawecanan Ida Rsi Bang Bhujangga Panulisan ring Ida I Gusti Anglurah Bija Pulaga mangda tunggil kawentenan Ida maka kalih. Irika Ida I Gusti Ngurah Bija Pulaga Kedharma Putra olih Ida Sang Rsi, sakeng irika raris sewarih Ida I Gusti Ngurah Bija Pulaga masikian pungkusan ring warih Ida Sang Pandhita, ngangge pungkusan Arya Wang Bang Wayabiya.

Suwe kasuwen kacarita mangkin negara Singharsa Bangli molihang kertha raharja miwah awor tis, seantukan I Gusti Ngurah Bija Pulaga ngawengku jagat Singharsa punika, macekin sapetitah Ida Bhatara Dalem, sayan becik antuk Ida ngambel jagat. wekasan kacarita I Gusti Ngurah Bija Pulaga madruwe putra lanang meparab I Gusti Dauh Bale Agung. Ri sampune I Gusti Ngurah Bija Pulaga lingsir raris keratone kaserahang ring putrane mangda macekin gumi Singharsa Bangli. Sapemadegan I Gusti Dauh Bale Agung jagate kreta raharja, seantukan yening I Aji malungka sanga, dane I Gusti Dauh Bale Agung malungka pitu, sregep mabusana Adhipati saha lante muwang sepayung agung. Ritatkala rahina saniscara  keliwon wara landep, mijil Ida ring penangkilan malinggih ring tepase sane inggil, nganggen busana sarwa wilis, mekampuh sutra jingga, akretan sutra gagulung, ring ajeng idane wenten berang pengawin, keapit antuk tamiang, ring ungkur wenten lelancang, tegep saha saupacaraning Adhipati, ebek ring penangkilan, ketampekin antuk para manca pepatih muwah Bendesa Pasek paling Wayahan. Sesampune tegep penangkilane raris mawecana Ida :" Bapa Pasek mwang Bendesa makejang apake Bapa nu sutindih teken manira, yen Bapa tindih manira pageh tekening para Bendesa Pasek sedaya". Raris matur I Bendesa Pasek sareng lelima :"Inggih Gusti Ngurah saking kawit wantah titiang kegambel antuk palungguh cokori ratu". "Nah yen Bapa Pasek mwang Bendesa tindih manira pageh teken kepasekan Bapane, jani Bapa ngemong ruange ring desa-desa sakuubing Singharsa Bangli, apang pageh Bapa tan dadi momo bhudi, ngisi kakencan di jaba", asapunika wecanan I Gusti Dauh Bale Agung ring para Pasek mwang Bendesa sedaya. 

Bersambung..........

SIRA AGRA MANIKAN

TATTWA SIRA AGRA MANIKAN

Mangkin kacaritayang Sira Agra Manikan putran Ida Dang Hyang Bang Manik Angkeran sane pinih alit, ring Besakih dane dados prajuru nabdabin Lawangan Agung Pura Besakih. Dane malungguh ring pesraman ngabih Ida Bang Tulus Dewa, ri sampun Sira Agra Manikan duhur, dane suwe nenten ngambil rabi, nuju rahina sane kacawisang Sira Agra Manikan lunga ke Lawangan Agung jagi mabersih bersih, irika dane kacunduk sareng putran dane Pasek Prateka sane mewasta Ni Luh Watusesa, suwening asuwe dane matemu wirasa tur saling kalulut asih raris kawentenang pawiwahan. ring sampune asuwe raris Ni Luh Watusesa mobot turmaning ngamedalang putra sane keparabin Sira Manikan.

Ngawit dane maduwe putra punika raris dane jumenek ring Lawangan Agung, nenten kacaritayang pekaryan dane, ring sampune raris Sira Manikan duhur tan dumade ngambil rabi sakeng putran I Pasek Kayu Selem sane mewasta Ni Luh Sari. Upakara pawidhi widanan kemargiang ring Lawangan Agung, nanging ri sampune asuwe raris Sira Manikan malinggih ring Batusesa miwah dane kapaica senjata BATU sane dahat mawisesa sareng keris PASUPATI sakeng Ajin Idane. Ring Batusesa raris dane ngawentenang putra tatiga, sane pinih luhur meparab Sira Manik Gumi, arine mapesengan Sira Ayu Manik Mas, lan putrane sane pinih alit mapesengan Sira Manik Arum.

Ring sampune Sira Manikan duhur, ajin dane tangkil ke Sweca Pura pacang ngewahin Ida I Gusti Anglurah Sidemen, Sira Manik Arum lunga ke Karang Amla. Ring Sweca Pura sedek kawentenan byuta sareng pasemetonan ngawinang Sira Manikan seda katuwek sakeng ungkur. Selanturnyane Sira Manik Gumi merabian sareng putran I Pande Besi sane mewasta Ni Luh Pande, Ida maduwe putra kakalih mapesengan I Ngurah Manikan sareng I Manik Gde Arum. I Ngurah Manikan malinggih ring Sweca Pura, I Manik Gde Arum lunga tur jenek ring Gianyar.

I Ngurah Manikan merabian sareng Ni Luh Biasama, dane katitahang dados prakangge Ida Dalem, dane maduwe putra petang diri, pinih duhur mawasta I Wayan Ngurah, kaping kalih I Made Dabdab, arin dane mawasta I Nyoman Brata, lan sane pinih alit mawasta I Ketut Kemoning.

Ring Gianyar I  Manik Gde Arum dados bala wadwa raja Gianyar, merabian sareng putran I Bendesa sane mewasta Ni Luh Kunti Sari, maduwe oka kalih diri, I Gede Ngurah Gni sareng arine I Gede Gianyar.

Ring Karang Amla, Sira Manik Arum merabian sareng okan dane I Gede Karangasem sane mewasta Ayu Putri, taler katitahang dados pengabih raja Karangasem. Dane maduwe putra adiri maparab Sira Manik Arum, riantuk wenten byuta ring Puri Sira Manik Arum lunga amurang-murang lampah. Sira Manik Arum marabian sareng Ni Luh Karang raris madruwe oka petang diri,  I Ngurah Wisesa, I Ngurah Karang, Ayu Mas, lan I Ngurah manikan.

Manut pikarsan Ida Dalem ring Sweca Pura I Wayan Ngurah keadegang prekangge, I Made Dabdab lunga mewali ke Besakih, tur kawengian ring Gembalan lan kacunduk sareng I Pande, irika raris madunungan, ritatkala punika kalulut asih sareng okan dane Ki Pande sane dahat listu ayu mawasta Ni Pande Dewi, nenten asuwe dane sang kalih merabian, gumentos I Made Dabdab jenek irika nenten durus ke Besakih. I Nyoman Brata katitahang NYAMBANG tur dados bala wadwa ring Budaga, irika dane kacunduk sareng Ni Ayu Bajing, kelanturang merabian turmaning jenek irika. I Ketut Kemoning katitahang dados bala wadwa nyambang ring wewidangan Kemoning, irika merabian sareng Ni Luh Canting tur raris jenek irika. selantur nyane nenten kacaritayang malih.

Ring Sweca pura I Wayan Ngurah merabian sareng Ayu Manik Mas, tur maduwe oka tigang diri, I Putu Gunadi, Ni Luh Manik Parasara, lan Ni Luh Suryani sane pinih alit. I Putu Gunadi merabian sareng  Ayu Mas, maduwe oka kekalih I Parasara sareng I Made Wardana camput. I Parasara merabian sareng Ayu Mangis Kuning maduwe oka nunggal mawasta I Putu Gelgel, ring sampune duhur keadegang dados pengabih I Gusti Anglurah Sidemen Sumertha, manut pengarsan Ida Dalem. I Putu Gelgel raris merabian sareng Ni Luh Sri Wardani, maduwe oka limang diri, sane pinih luhur I Putu Parasara, raris I Made Wijaya, Ni Luh Wardani, I Gede Manikan, lan I Catri Arsana sane pinih alit.

Malarapan antuk kawentenan Puri Gelgel sayan uwug sawetara warsa masehi 1685 I Putu Paresare sareng sameton nyane kesah saking Sweca Pura, Gelgel.  I Putu Paresare lunge nganginang rauh ring delod Bukit Indrawati sane mangkin kawastanin Ulakan, turmaning jenek irika. nenten kacaritayang yan akudang warsa irika ngantos kacunduk sareng Ni Luh Nurida sane dados rabine kawekasan  kasuensuen madue oka tigang diri sane pinih duhur mawasta I Wayan Bujangga arine I Made Suda miwah I Nyoman Brati sane pinih alit kasuen-suen wenten patitah Ida Dalem ring gelgel mangdane I Wayan Bujangga sareng I Made Suda kautus makta sewalapatra nuju keraton Bangli. Rauh ring Bangli kapanggih I Gusti Anom Wanasari tur malarapan antuk swecan idane makakalih kadadosang bala wadwa tur jenek ring Bangli. I Nyoman Brati lunga ka sasak. Inggih menengang dumun.

Kacarita mangkin arin I Gustin Anglurah Mangku Sidemen sane mapesengan I Gusti Made Teges sane magenah ring Karangasem, suwen kasuwen ewuh katinggalin sametone I Gusti Anom Wanasari sane magenah ring Bangli. Raris I Gusti Made Teges kairing sareng wadwa Puri Karangasem makta senjata Sangkut sane mapesengan Ki Barujaya lan Pawedaan ngarereh ke Bangli mangda I Gusti Anom Wanasari mantuk ke Karangasem. gelisang carita rauh Ida ring Bangli, raris katunas sametone ring Anake Agung ring Bangli pacang kairing ke Karangasem. Anak Agung Bangli nenten ngicen I Gusti Anom Wanasari sareng lunga ke Karangasem, Ida raris nauhin panjake mangda ngiring, nangin I Gusti Made Teges nenten ngelungsur iringan akweh, wenten mula kaduwe antuk I Gusti Anom Wanasari sane kantun anom mapesenngan I Made Suda, mula terehing Manikan mangda ngiring. I Gusti Made Teges ngiring pangandikan Anake Agung ring Bangli, raris Ida mepamit ngiring sametone I Made Suda, taler kesarengin antuk wadwa sane kapaice antuk Anak Agung ring Bangli lunga ke Karangasem. rauh ring karangasem Ida ngewangun Puri sane mangkin mapesengan Karang Sidemen.

Yan akudang warsa I Made Suda ngiring I Gusti Made Teges  ring Karangasem raris I Made Suda ngambil rabi ring Belong, Karangasem, maduwe oka tatiga sane mapesengan, I Ganti, Ni Luh Bagia lan I Komang Jata sane pinih alit. Suwen asuwen I Ganti ngumbara ke jagat Badung ring Kerobokan. I Komang Jata lunga ke Ulakan.

Mewali caritayang mangkin sameton I Putu Parasara kaping kalih sane mapesengan I Made Wijaya. Dane lunga ke widangan Buleleng, raris kaputusang jenek irika. Irika kedadosang bala wadwa Sang Prabu Buleleng gumentos matemu oka I Pasek Prateka sane mewasta Ni Luh Pasek Lemuh. Nenten kacaritayang malih.

Luh Wardani ngeranjing ke Puri pinaka dayang, I Gede Manikan jenek ring Gelgel matemu lan merabian sareng Ni Widiasih. Ring Puri Gelgel kawentenan nyane sayan biyut, olih I Gusti Agung Maruti sane ngarsayang linggih kaprabon. Makesah I Gede Manikan saking Gelgel ke Bala Batuha, sane mangkin mewasta Blahbatuh sareng wadwan I Gusti Ngurah Jelantik.

I Catri Arsana lunga ke wawidangan Badung, irika merabian sareng Ayu Kunti Manik gumentos maduwe oka kalih diri, I Wayan Majun sareng I Made Gede Rai.

            Inggih asapunika kawentenan pretisentana Sira Agra Manikan  pidartaniya nguni, katattwaning pretisentana sang Catur Warga Catur Sanak, para pretisentana Sang Mahayati Ida Dang Hyang Sidhi Mantra maputra Ida Dang Hyang Bang Manik Angkeran ring Bali Pulina.

Puniki sapanya :

 "Om Ksamaswamam Pangastutyem,

 Sarwa Sujanyem Siwa Bhudayem,

Wetting Hina Wakyem Hina Budyem,

Hinaksarem Hina Prityaksyem,

Siddhakarem Wahya Turyanem,

Grahanem Edatwantu Simantanem".

Puput.