UGRAWAKYA

Inggih pidaging nawegang titiang ngelungsur uratian majeng ring parauleman kalih para atiti bhakta sareng sami, sadurung titiang ngelanturang atur ngiring sareng-sareng nunas wara nugraha majeng ring Ida Sang Hyang Parama Kawi, pamekas  majeng ring Ida Betara sane malingga iriki ring merajan pasek Gelgel bendesa Manik Mas  dumadak napi sane katur malih bosbos puniki sida nemu rahayu labda karya mapala sidaning don antuk ngaturang pengastungkara Panganjali :

 "Om Swastyastu"

Majeng ring  Iratu Peranda sane dahat suci lan kasumayang titiang

Ring linggih dane Jro Mangku kalih Jro Dangka sane  suciang titiang,

Ring linggih dane Jro Bendesa sane kesarengin antuk manggala adat sami sane bhaktinin titiang

Majeng ring linggih dane Bapak Kepala Lingkungan Kubu sane wangiang titiang

Iratu Ida dane para atiti bhakta sareng sami pamekas  tan kasep majeng ring  Krama Dadia merajan pasek gelgel Bendesa Manik Mas sane tan prasida antuk titiang nyarca siki kalih sane banget tresna sihin titiang

Rasa angayu bagia, luir kadi angganing puspa sumekar  wiakti manah titiang kadi mangkin,riantukan prasida matemu  mesadu rasa majeng ring I ratu Ida Dane sareng sami ri tepengan galah sane kalintang becik puniki. Titiang ngangganin krama Dadia pinih riin ngaturang swasti prapta utawi rahajeng rauh mantuka ring para uleman sareng sami sane sampun ledang rauh nedunin nagingin minekadi pangelungsur titiang mangda ngupasaksi ritatkalaning titiang Krama Dadia ngawentenang  Upacara    Pawintenan Jro Mangku Pasek Gelgel Bendesa Manik Mas Desa Pekraman Kubu, sane kadulurin taler Upacara Piodalan Ida Bhatara Kawitan, sane pacang  kemargiang  ring galahe malih bosbos puniki. ring sajeroning pemargi punika wenten atur titiang sematra majeng ring I Ratu Ida Dane sareng sami .

Pinih riin lugrayang titiang ngaturang pari indikan  kawentenan Merajan  lan Krama penyungsung/Dadia, merajan  puniki wantah  silih situnggil kuwuban kula gotra pasek gelgel sane magenah ring wewengkon Desa Pekraman Kubu  sampun ngawit ketangiang ring warsa 1980. Ring warsa 2012, titiang krama penyungsung prasida ngawentenang pangelimbak pelataran ida betara tur ngupakara mlaspas lan ngenteg linggih ring rahina anggara kliwon wuku  julungwangi pinanggal 17 januari warsa 2012 sane lintang. ring sajeroning punika wenten kirang pemargi inggih punika kawentenan pamongmong ida betara nenten wenten, riantukan dane jro mangku lingsir sampun seda ring warsa 2003, mawiwitan antuk kasumanggeman raris krama dadia ngelungsur majeng ring linggih dane I Nengah Pastika mangdane prasida ngemargiang sesananing kepemangkuan pinaka jan banggul ida betara kawitan iriki. nemu galah becik ring galah rahina anggara keliwon wuku  julungwangi sasih kapat pinanggal 8 Oktober  2013 puniki  titiang ngelungsur pesaksi majeng ring iratu ida dane sareng sami ring sajeroning polah palih upacara pawintenan jro mangku pasek gelgel bendesa manik mas iriki.   setios punika taler aturang titiang munguwing kawentenan Krama dadia druwene iriki kadi mangkin wenten meakeh 29 kuren. Krama dadia titiang iriki satios ring wewidangan Kubu taler wenten sane magenah ring  desa Gelagahlinggah Kintamani meakeh 9 kuren,  kawentenane punika  mejanten sampun abot pisan antuk titiang minabdabin, nanging sangkaning  pasuwecan Ida Hyang Widhi Wasa Ida bhatara Kawitan kalih para Leluhur sane kadulurin antuk kaulengan lan kasumuyugan Krama Dadia  sami, prasida raris titiang nitenin krama ngemargiang  renopasi  utawi mecikang linggih Ida Bhatara- Bhatari, taler nyangkepin wewangunan sane kapastikayang  kirang ring sajeroning polah - palih Pura/merajan. Wewangunan punika sekadi Bale KulKul, Bale pewaregan lan sane tiosan.

 Ring kawentenan asapunika kadi mangkin banget titiang ngelungsur majeng ring linggih dane jro bendesa  mangda prasida ngicenin titiang piteket pemargi  dumogi yadnya sane apetik sari puniki prasida memargi labda karya mepala sidaning don.

Ainggih para uleman  kalih I Ratu Ida Dane sareng sami, kadi asapunika prasida antuk titiang nguningayang pari indikan rerincikan titiang pacang ngemargiang  Upacara  Pawintenan sane maduluran Piodalan Ida Bhatara Kawitan puniki,  titiang banget ngelungsur geng rna pengampura menawita wenten   atur lan paripolah titiang tatkalaning minabdabin pemargin acara puniki wenten sane nenten manut ring sajeroning pikayun, taler lungsurang titiang mantuka ring linggih dane Jro Bendesa mangda ledang micayang sambrama wecana sepisanan taler mapikukuh lan nyobyahang  pemargi puniki ring wawengkon desa pekraman Kubu.

Inggih kadi asapunika atur jagra winungun titiang, maka wesananing atur titiang ngaturang parama santih,

Om Santih, Santih, Santih Om

 MELASPAS RATU NINI LAN RATU ANOM

Inggih pidaging nawegang titiang ngelungsur uratian majeng ring parauleman kalih para atiti bhakta sareng sami, sadurung titiang ngelanturang matur, ngiring sareng-sareng nunas wara nugraha majeng ring Ida Sang Hyang Parama Kawi, pamekas  majeng ring Ida Betara sane malingga iriki ring Pura Dalem Agung, dumadak napi sane katur malih bosbos puniki sida nemu rahayu labda karya mapala sidaning don antuk ngaturang pengastungkara Panganjali :

 "Om Swastyastu"

Majeng ring  Iratu Peranda sane dahat suci lan kasumayang titiang

Ring linggih dane Jro Mangku kalih Jro Dangka sane  suciang titiang,

Palungguh Bupati pinaka murdaning jagat Bangli sane bhaktinin titiang

Manggala DPRD Kabupaten Bangli sane kasumayang titiang

Bapak Camat Bangli sane wangiang titiang

Manggala PHDI Kabupaten Bangli sane mustikayang titiang

Bapak Lurah Kubu sane wangiang titiang

Ring linggih dane Jro Bendesa sane kesarengin antuk manggala adat sami sane bhaktinin titiang

Majeng ring linggih dane Bapak Kepala Lingkungan Kubu sane wangiang titiang

Iratu Ida dane para atiti bhakta sareng sami pamekas  tan kasep majeng ring  Krama Desa Adat Kubu  sane tan prasida antuk titiang nyarca siki kalih sane banget tresna sihin titiang

Rasa angayu bagia, luir kadi angganing puspa sumekar  wiakti manah titiang kadi mangkin,riantukan prasida matemu  mesadu rasa majeng ring I ratu Ida Dane sareng sami ri tepengan galah sane kalintang becik puniki. Titiang ngangganin krama Penyanggra Ratu Gde pinih riin ngaturang swasti prapta utawi rahajeng rauh mantuka ring para uleman sareng sami sane sampun ledang rauh nedunin nagingin minekadi pangelungsur titiang mangda ngupasaksi ritatkalaning titiang Krama Penyanggra Ratu Gde ngawentenang  Upacara    Pemelaspas lan Pasupati Petapakan Ida Betara Rangda sane sampun prasida ke odakin antuk linggih Ida Duagung  saking Puri Kawan Tanggu Bangli. Upacara puniki taler pacang kawewehin antuk upacara ngerehang utawi nunas kasidian Ida Betara Dalem semangdene petapakan Ida betara prasida ngicenin kerahayuan ring para krama penyanggra kalih utaman nyane ring krama desa pekraman Kubu lan  pamekas nyane umat hindu sinamian.

Ratu Peranda kalih Palungguh Bupati sane mustikayang titiang, Ring galahe sane becik puniki taler lugrayang titiang ngaturang sapari indikan kawentenan Petapakan Ida Betara Ratu Gde kali Betara Rangda sane wenten ring desa pekraman Kubu Puniki, ring warsa 1986 kekawitin antuk ngawentuk sekaha barong sane kraman nyane wantah sane maduwe pekayunan ledang utawi sene kebaos sekaha demen. Galah raris ngelantur ring warsa 1987 sangkaning titah Ida Sang Hyang Paramakawi barong sane nyabran Galungan puniki kelawangang dados nyane kalinggihin/kaelingin antuk Ida Betara sasuhunan ring sajebag desa pekraman Kubu. Punika mawinan ring sampune wenten panamaya kakaryanang upakara lan upacara pemelaspas lan pasupati ring Pura Puseh. Manut kadi panugrahan Ida Betara sasuhunan ledang minakadi palinggih Idane wenten ring Pura/Merajan Dadia. Yadiastun malinggih ring Pura/Merajan dadia, sakemawon para atiti, para bhakta sinami prasida medek tangkil ngaturang pangubhakti, satios ring krama desa pekraman kubu taler wenten krama saking tios desa sane wenten magenah ring tampek palinggih Ida Betara sane rauh ngaturang subakti.

Ratu Peranda, Palungguh Bupati kalih Manggala DPRD sane baktinin titiang, 27  tiban sampun memargi pakilitan titiang ring krama penyanggra, mejanten sampun sasuwen punika wenten pasang surut nyane, ring galahe sane mangkin puniki aturang titiang krama penyanggra meakeh 42 diri, mawiwitan saking dreda bhakti majeng ring Ida Betara sasuhunan, prasida raris ngawentenang pemargi pangentosan petapakan Ida Betara RANGDA sane ketah iriki kasengguh Ida Betara Ratu Nini kalih Ratu Anom, ring sapemadegan Ida betara kadi mangkin puniki banget titiang ngelungsur kaledangan Ratu peranda ping kalih Palungguh Bupati mangda suweca ngicenin piteket lan pewarah-warah sumangdene titiang krama penyanggra pingkalih krama desa pekraman kubu prasida nincapang pangaweruhan ring sajeroning ngemargiang dharma agama lan dharma sesana  druwene

Ainggih para uleman  kalih I Ratu Ida Dane sareng sami, kadi asapunika prasida antuk titiang nguningayang pari indikan rerincikan titiang pacang ngemargiang  Upacara  Pemelaspas lan Pasupati  sane maduluran upacara Pangerehan ring setra desa pekraman kubu  puniki,  titiang banget ngelungsur geng rna pengampura menawita wenten   atur lan paripolah titiang tatkalaning minabdabin pemargin acara puniki wenten sane nenten manut ring sajeroning pikayun, taler lungsurang titiang mantuka ring linggih dane Jro Bendesa mangda ledang micayang sambrama wecana sepisanan taler mapikukuh lan nyobyahang  pemargi puniki ring wawengkon desa pekraman Kubu.

Inggih kadi asapunika atur jagra winungun titiang, maka wesananing atur titiang ngaturang parama santih,

Om Santih, Santih, Santih Om

Ainggih pidaging nawegang titiang ngelungsur uratian majeng ring parauleman kalih para atiti, para  bhakta sareng sami, sadurung titiang ngelanturang parikrama puniki, ngiring sareng-sareng nunas wara nugraha majeng ring Ida Sang Hyang Parama Kawi, pamekas  majeng ring Ida Betara sane malingga iriki ring Pura Dalem Agung, dumadak napi sane kemargiang malih bosbos puniki sida nemu rahayu labda karya mapala sidaning don antuk ngaturang pengastungkara Panganjali :

 "Om Swastyastu"

Majeng ring  Iratu Peranda sane dahat suci lan kasumayang titiang

Ring linggih dane Jro Mangku kalih Jro Dangka sane  suciang titiang,

Palungguh Bupati pinaka murdaning jagat Bangli sane bhaktinin titiang

Manggala DPRD Kabupaten Bangli sane kasumayang titiang

Bapak Camat Bangli sane wangiang titiang

Manggala PHDI Kabupaten Bangli sane mustikayang titiang

Bapak Lurah Kubu sane wangiang titiang

Ring linggih dane Jro Bendesa sane kesarengin antuk manggala adat sami, sane bhaktinin titiang

Majeng ring linggih dane Bapak Kepala Lingkungan Kubu sane wangiang titiang

Iratu Ida dane para atiti, para  bhakta sareng sami pamekas  tan kasep majeng ring  Krama Desa Adat Kubu  sane tan prasida antuk titiang nyarca siki kalih sane banget tresna sihin titiang.

Swasti prapta utawi rahajeng rauh aturang titiang mantuka ring para uleman sareng sami sane sampun ledang ngrauhin nagingin minekadi pangelungsur titiang mangda ngupasaksi ritatkalaning titiang Krama Penyanggra Ratu Gde ngawentenang  Upacara    Pemelaspas lan Pasupati Petapakan Ida Betara Rangda sane abiseka Betara Ratu Nini kalih Betara Ratu Anom, sepengrauh Iratu Ida dane puniki mejanten sampun mabuat pisan ring sajeroning pemargi upacara puniki, munguing parikrama sane pacang kemargiang punika minekadi :

1.    Pemahbah

2.    Atur pakeling sakeng manggala acara

3.    Sambrama wecana sakeng Bendesa Desa Pekraman Kubu

4.    Sambrama Wecana sakeng shaba sedaka PHDI Kab. Bangli

5.    Sambrama wecana sakeng Palungguh Bupati Bangli.

6.    Pamuput

7.    Mesandekan

Inggih ratu ida dane sareng sami sane mustikayang titiang, kadi asapunika munguing eed parikrama sane pacang katur ring galahe sane becik puniki. tincapang titiang nemangkin ring parikrama selantur nyane inggih punika atur pakeling sakeng manggala acara, inggian galah durusang.......

inggih punika iwawu sampun katur majeng ring Iratu Ida dane sareng sami mungguing atur  petangi  sakeng manggala acara, sane mangkin tincapang titiang ring parikrama selantur nyane inggih punika sambrama wecana sakeng jro Bendesa Desa Pekraman Kubu, indik galah durusang.......

inggih kadi asapunika sambrama wecana sane kapaice mantuk ring Jro Bendesa desa pekraman Kubu, tincapang titiang sane mangkin ring parikrama selanturnyane inggih punika, sambrama wecana sakeng Ratu singgih peranda pinaka manggala ring sabha sedaka PHDI Kabupaten Bangli, inggian galah katur............

ainggih pare uleman lan atiti sinareng sami,  kadi asapunika tel pawecana sakeng manggala PHDI kabupaten bangli sakeng sabha sedaka sane kedagingin antuk Ida Peranda Griya Manggis. sane mangkin tincapang titiang malih ring parikrama selanturnyane inggih punika sambrama wecana sakeng palungguh Bupati murdaning jagat Bangli, inggian galah praya katur.............

ainggih kadi asapunika tel pawecana sakeng palungguh bupati risasat prasida neduhin kawentenan krama ring sejebag jagat Bangline pamekas nyane krama desa pekraman Kubu, bilih-bilih ring krama penyanggra ratu Gde sane dahat ngulatiang kerahayuan lan kasukertan jagate sami. Tan mari wantah panyuksmaning manah katur majeng ring palungguh Bupati dumogi napi sane kapaica sane wawu prasida kalimbakang ring umat hindu druwene pamekasnyane krama desa pekraman kubu puniki.

Para uleman, atiti bhakta sareng sami kadi asapunika munguing eed parikrama sane kemargiang ring galahe sane becik kadi mangkin atur panyuksman titiang majeng ring iratu para atiti, para bhakta pamekasnyane ring pare uleman sareng sami sampun prasida nyarengin parikrama puniki kantos puput, tiosan punika titiang banget ngelungsur geng rna pengampura menawita ring sajeroning titiang ngemargiang eed parikrama puniki wenten atur lan paripolah titiang sane nenten manut ring sajeroning pikayunan. dumogi sangkaning pengacep lan pengerastiti iratu ida dane sareng sami jagat lan sedaging jagat sida manggihang kerahayuan, sarwa prani hitangkarah, asing tinandur sarwa mupu, asing tinuku sarwa murah.

ring parikrama sane pinih untat inggiang punika mesandekan, ring galah puniki iratu ida dane sareng sami jagi iring titiang katuran bhoga sematra melarapan antuk katuran ajengan yasa. inggih kadi asapunika mungguing eed parikrama pinaka wesananing atur titiang,  titiang ngaturang parama santi.

Om Santih, Santih, Santih, Om.

Suksma...........