MEWINTEN

MAWINTEN NYUCIANG ANGGA SARIRA MELARAPAN ANTUK “NGRAJAH AKSARA”

Pinaka krama sane magama Hindu utaman ipun ring jagat Bali janten madruwe kepatutan ngemargiang makudang-kudang upakara yadnya, silih sinunggil nyane upacara rsi yadnya. Rsi yadnya punika makudang kudang paletan wenten ring Bali, manut sekadi tatujon sane kabuatang, wenten upacara mapodgala, mediksa, mewinten miwah sane tiosan. Sami upacara punika madruwe tatujon nyuciang kahanan angga sarira melarapan antuk ngerajah aksara ring angga sarira sane maduwe tatujon ngelebur sekancan mala sane wenten ring angga sarirane. Tios punika upacara inucap kemargiang pinaka cihna krama Hindu kedadosang nelebin sastra-sastra suci wiadin ngeranjing ring parindikan spiritual. Pawintenan sane pinih nista utawi pawintenan dasar  inggih punika pawintenan Saraswati sane kemargiang antuk tatujon nyuciang angga sarira tatkala krama ngawitin nelebang peplajahan sane mautama ring kahuripan, sane mangkin upacara punika kemargiang melarapan  antuk upacara Upanayana ring sekolah wiadin ring Perguruan tinggi. Rikala krama inucap nincapang raga utawi ngemargiang swadharma pinaka pemangku kahyangan, pemangku dadia, pemangku dalang, pemangku jan banggul miwah sane tiosan sinah patut kemargiang malih soroh pawintenan kepemangkuan, minekadi pawintenan dasa guna, pawintenan dasa bayu, pawintenan sang kulputih miwah sane siosan. Sangkaning agengan wangun ipun sinah upakara miwah parikraman nyane taler agengan. Yening ring pawintenan saraswati nenten ngawigunayang pidabdab mapedamel miwah nenten medaging bebek putih. Nangin ring pawintenan kepemangkuan jagi ngawigunayang bebek taler upakara sane tiosan. Sayan ageng pawintenan sane kemargiang sinah sayan akeh paileh upacra miwah upakara sane kawigunayang. Sadurung prasida ngemargiang pawintenan sane ageng janten krama punika sampun ngemargiang pawintenan saraswati, utawi pawintenan bungan. Silih sinunggil parikrama sane utama ring upacara pawintenan inucap inggih punika ngrajah aksara ring angga sarira. Manut lontar saraswati angga sarira suwang-suwang jadma kawangun antuk mekatah pariindikan sane kacihnayang antuk aksara – aksara suci sane magenah ring angga sarira. Aksara mawi9t saking kruna “:A Ksara”. A maarti nenten, Ksa maarti ical, sara maarti piranti. Dados nyane Aksara punika maarti parindikan piranti sane nenten prasida kaicalang  tur setata langgeng kahanan ipun. Ring sajeroning ilmu fisika ketah kebaosang “Energi” / Prana. Tat kala aksara punika kerajah ring angga sarira tatujon nyane wantah nguripang malih saha ngamecikang energi sane wenten ring angga krama hindune melarapan antuk aksara suci. Mangdane tatkala krama inucap nelebang sekancan sastra suci tur tenget wiadinj napi pinaka tatujon nyane nenten ngemanggihin pikobet, tios punika taler keaptiang aksara suci sane wenten ring bhuana agung miwah bhuana alit utawi angga sarira prasida mancung “terkoneksi” matunggalan . Nganin indik aksara sane kawigunayang ring pawintenan inucap manut saking sane munggah ring lontar aji saraswati wantah ngawigunayang aksara wreastra utawi hanaceraka, sane kerajah ring suwang-suwang genah sane sampun kejantenang, wenten taler sane ngawigunayang aksara modre, dasaksara, bijaksara, miwah aksara suci tiosan ring  genah-genah sane sampun kejantenang. Soroh pawintenan sane kemargiang jagi nabdabang tur nyihnayang soroh aksara sane napi manten pacang kerajahang ring angga sane mawinten. Upacara mawinten wantah upacara sane kemargiang anggen nyuciang  angga sarira taler pinaka cihna yening kramane sampun dados nelebin wiadin ngranjing ring parikrama sane kaucap suci utawi spiritual, punika mawinan sapasira ugi dados ngelaksanayang pawintenan antuk nganutin tata titi lan pula pali sane patut kemargiang. Nganinin indik sambada sane nenten dados kalempasin olih krama sane sampun mawinten inggih punika mejanten sampun patut nyane kedasarin antuk maguron-guron, yening krama sane sampun mawinten prasida ngamecikang parikrama kahuripan nyane serahina, medasar antuk setata ngemargiang tri kaya parishuda utawi mapikayun, melaksana lan ngerawos sane becik, yening sampun  kadi asapunika  sinah upacara inucap  satmaka dados pangeret rikala jagi meparilaksana sane nenten becik utawi kaon ring sajeroning ngemargiang kahuripan.