BANTEN PANGRESIKAN/PANGLUKATAN

 

UPAKARA/BANTEN

         Upakara ring agama Hindu kepah dados tatiga, kapertama Pangresikan kaping kalih Ayaban lank aping tiga pinunas/permohonan. Pangeresikan/ Pangelukatan/ Eedan punika wantah pemargi angge ngresikin/ mersihin/nyuciang upakara lan genah upakara. Pengeresikan puniki memargi ring bhuana agung mwah bhuana alit inggih punika ring tri bhuana, Bhur Loka, Bwah Loka lan Swah loka. Yening ring bhuana agung janten sampun ring sor, madya lan luhur. Yening ring bhuana alit inggih punika ring wangkong nedunang/sapta petala, ring wangkong ngantos kanta/sapta loka lan ring kanta ngantos prabu/sapta sunia. Sedereng banten pangulap/Bayuan kemargiang pinaka pangundang Ida betara mangda sida malinggih ring palinggih sowang sowang sepatut nyane resik dumun bhuana agung mwang bhuana alit wawu sida Ida Betara malungguh.

Ngelantur banten Ayaban, Ayaban punika dados kepah manista, madya lan utama. Sane manista inggih punika tumpeng 5,7 lan 9. Sane madya ayaban tumpeng 11, 15 lan 17 medaging sekar taman. Naler sane utama inggih punika tumpeng 21 medading sekar taman lan pulo gembal, 27 lan 33 dados medaging sekar taman, pulo gembal lan bebangkit.

Sane dahat utama inggih punika pinunas/Sesayut, sesayut punika manut sekadi pengapti sane kabuatang. Ring upacara panca yadnya sampun akeh wenten sesayut sesayut sane sampun kasuratang, patut tureksa napi sane maka unteng tatujon jagi tunas majeng ring hyang parama kawi.

 BANTEN PANGRESIKAN

 1.        BANTEN TATEBASAN BAYAKAONAN/KALA HYANG:

                     Medasar antuk tatempeh utawi sidhi mesusun antuk taledan, medaging beras ajumput, benang lan tampelan asiki, duwur nyane dagingin kulit peras antuk don pandan, duwur kulit peras nyane dagingin nasi   maslekos sumping ( metajuh matimpuh ) utawi tumpeng barak asiki, kojong rangkadan asiki, lis bebuhu, isuh – isuh atakir, taluh siap matah asiki, sepet sambuk, danyuh metegul, raka woh-wohan, canang pahyasan, sampiyan nagasari, penyeneng alit sasedep tepung tawar, tatebus benang barak, coblong asiki, payuk pere asiki, sami eteh – eteh nyane melakar antuk don andong barak.

        2.        BANTEN TATEBASAN DURMANGALA:

Medasar antuk tatempeh, mesusun kulit sayut, raka woh – wohan sarwa galahan, tumpeng injin asiki, limas medaging nasi penek mecongger bawang jahe matusuk, limas malih asiki medaging nasi penek mecongger terasi ( sere ) matusuk, nasi nyane metatakan antuk kampil, kojong rangkadan, daksina asiki, pras tulung sayut, ketipat kelanan, base tulak mewadah takir, canang pahyasan, taluh bekasem, lis peselan, padma, penyeneng alit, bungkak nyuh gadang asiki, sampiyan nagasari, sasedep tepung tawar, tatebus benang selem, lis peselan, padma asiki, coblong asiki, payuk pere asiki, sami eteh-eteh nyane melakar antuk selepan.

       3.        BANTEN TATEBASAN PRAYASCITTA:

Medasar antuk tatempeh masusun kulit sayut, raka woh – wohan, nasi bunter maklongkong, nasin nyane medasar antuk don tabya bun lima bidang, jahit mangdane bunter, duwur nasine tancebin muncuk don dapdap lan padang lepas pada telung katih, kojong rangkadan, peras alit asiki, penyeneng alit asiki, sasedep tepung tawar, tatebus benang putih, sampiyan nagasari, canang pahyasan asiki, kalungah nyuh gading asiki, lis prayascitta, padma asiki, coblong asiki, payuk pere asiki, sami ateh-eteh nyane melakar antuk busung.

          4.        BANTEN TATEBASAN PENGULAPAN/BAYUAN:

Medasar antuk tatempeh mesusun antuk taledan gede, dagingin raka woh-wohan jangkep, tumpeng alit solas bungkul dados aceper, untek duang dasa dua bungkul dados aceper, kojong rangkadan, daksina asiki, ketipat kelanan, ajuman/ sodaan alit, peras tulung sesayut, peras alit, penyeneng alit, wewakulan masampiyan nagasari, sasedep tepung tawar, lis peselan, padma asiki, sangga urip, tegteg, canang pahyasan, coblong asiki, payuk pere asiki.

 

Indik ngemargiang pangresikan utawi pangelukatan luir ipun           :

1.      Api danyuh lan penamah memargi ring sor, orobin sami pinaka pangesengan mala letuh ring Bhur Loka raris tancebang penamah asiki. Aksarania ANG

2.      Toya Anyar memargi siratang  ring sor anggen nganyudang saluiring mala letuh ring Bhur Loka. Aksarania UNG

3.      Banten Byakala/Kala Hyang, ayabang lan siratang tirtan nyane ring sor anggen

ngampehang saluiring mala letuh ring Bhur Loka. Aksania MANG.

 

4.      Banten Durmengala, ayabang lan siratang tirtan nyane ke madya anggen ngelebur papa

klesa ring Bwah Loka. Aksarania MANG

5.      Bungkak Gadang, siratang ring madya anggen nganyudang papa klesa ring Bwah Loka.

Aksarania UNG

6.      Lis Selepan, kosokan ring madya anggen munahang papa klesa ring Bwah Loka.

Aksarania ANG

 

7.      Sibuh Pepek lan Kukusan, siratang ring luhur anggen marisudha papa klesa Swah Loka.

Aksarania UNG

8.      Lis Busung, kosokang ring luhur anggen ngeseng saluiring rogha wigna ring Swah Loka.

Aksarania ANG.

9.      Prayascita, ayabang lan siratang tirtan nyane ke luhur anggen murnayang  tri mala, panca

mala lan dasa mala  ring  Swah Loka. Aksarania MANG.

10.  Bayuan/Pengulapan, ayabang ring luhur luhur maka sedana ngelinggihang ida betara sane

kauntap. Ang.

      11. Tirtha Sangku/Siwamba. Ah

Puja astuti sang pandita/Pinandita,Ong,,,,,Damar Sentir....